مشاعر خاصه للياسمين

الغروب اللي احتواني ما لقى فيني شروقه
والعيون اللي بكتني ليه شافتني مرايه
والثواني عند بابك مالها شفّ وتذوقه
خمرك اللي من شفاتي شاربه حد الغوايه
ما تعودت الفراق وما عرف هالقلب شوقه
قبلك انت ولا تقاسم غيرك اشواقي معايه
من عرفتك يا غناتي وانت لي نخلٍ عذوقه
صدق واخلاص ومحبه حلم الى ما لا نهايه
منتهيني من بداية آخري لأول عروقه
مبتديني من نهاية أولي لآخر بدايه
حاصريني من جوانب خافقي تحته وفوقه
اشعليني من غرامي نور للماشي ورايه

اقسم انه من عرف طيبك ولا هزه خفوقه
ماعرف طعم الحياة ولا عرف معنى الكفايه
كن بشار إبن برد اشتاق لك لحظة فسوقه
لين حس بدفئ قلبك واعتنق درب الهدايه
وانشغل بك امرؤ القيس المولّع في طروقه
كن ماله هاجسٍ غيرك واخذتيها هوايه
ولو وصفْك البحتري يوم انتثر شعرك وطوقه
ليل طاغي يحجب اضواء المدينه في حكايه
ولو يشوفك إبن زيدون انكوى زادت حروقه
ولا بكى من عقب ولاّده ولا شفناه تايه
ولو درابك عنتره ما حاز مغنم فوق نوقه
لين يلثم ثغرك الباسم ودونه كل غايه
من يلوم ابن الملوّح لا فقد عقلٍ يسوقه
بعد حب العامريه مالقى فـالدرب آيه
ولو عشق هالياسمين أستل من غيمه بروقه
لجل ورد الياسمين الكل ينسج له روايه
جاك قلبي من بداية لهفته همّه يعوقه
ماشيٍ بين انتفاء المغفره والحان نايه
لا تخليني اسامر حيرتي بدمعات موقه
في غيابك تكسر الاهات فيني 1000 رايه
ياحبيبي انت في قلبي حياته وانت ذوق
قبل ما تتركني أذكر ان لك حق الوصايه

اشكرك يا قلبي على الرد